manzil-e-ziist1 ke bas Khwaab hii dekhaa karte
aap dete nah agar saath toh hum kyaa karte
waqt ke safheh2 ulaT detaa koii gar tab bhii
log toh log haiN har bhuul dobaaraa karte
baadaloN se kise phir koii shikaayat hotii
gar baraabar yeh sabhii khetoN peh barsaa karte
asl-e-asha'ar toh afkaar haiN3 alfaaz nahiiN
bin tirii fikr kiye zikr tiraa kyaa karte
garm baazaar a'qiidoN4 kaa hai 'Raaqim' tum bhii
a'ish karte jo khilaune yahii bechaa karte
(1. life's destination 2. pages 3. thoughts are the essence of poetry 4. faiths)