woh milaa hai toh yeh dil Khush bhii hai hairaan bhii hai
kuchh woh ma'anuus1 bhii hai aur kuchh anjaan bhii hai
hai yaqiiN un ko k ik dah'r2 kaa bhagwaan bhii hai
hum ko yeh shak hai k Khud aadmii insaan bhii hai?
gul hii gul hoN jahaaN kaaNToN kaa nah ho naam o nishaaN
puuchho gulchiiN se kahiiN aisaa gulistaan bhii hai
sach toh ma'aluum hai par wahm hai jannat kaa ise
tajrubekaar bhii hai dil miraa naadaan bhii hai
jab bhii piitaa hai haqiiqat hii beyaaN kartaa hai
woh sharaabii hai magar nek musalmaan bhii hai
ab yahaaN koii nah aayegaa yeh ma'aluum bhii hai
aur darwaazeh peh har lamha miraa dhyaan bhii hai
(1. familiar 2. world)