kaam aatii nahiiN yeh zanjiireN
mil hii jaatii haiN raaNjhoN ko hiireN
kartaa rahtaa huuN maiN jo tadbiireN1
haNstii jaatii haiN un pe taqdiireN
kyaa musawwir2 ne kahnaa chaahaa thaa
aur kyaa kah rahii haiN taswiireN
waqt ne zaKhm bhar diye lekin
dho nah paayaa tamaam ta'asiireN3
tuune dil meN jo boye haiN 'Raaqim'
Khaar4 yeh teraa hii nah dil chiireN
(1. plans 2. painter 3. impressions 4. thorns)