sawaal-e-zindagii itnaa toh pechiidah nahiiN hotaa
agar maiN chaaNdanii raatoN meN yuuN tanhaa nahiiN hotaa
faqat dil chasp hone se koii acchhaa nahiiN hotaa
nazar meN jo chamaktaa hai woh sab sonaa nahiiN hotaa
wahii lailah, wahii majnuuN, wahii raadhaa, wahii mohan
kitaaboN meN tiraa meraa kabhii charchaa nahiiN hotaa
Khud apne raaste DhuuNDo, Khud apnii manzileN paao
yeh shahr-e-ziist1 hai is kaa koii naqshaa nahiiN hotaa
muhabbat jo nibhaataa hai wahii sacchaa mashiihaa hai
nah jis meN uThate hoN tuufaaN woh dil daryaa nahiiN hotaa
Khudaa Ghaayab hai lekin sab kii apnii raaye hai us par
Khudaa aisaa nahiiN hotaa, Khudaa waisaa nahiiN hotaa
muhabbat meN wahaaN tak aa gayaa huuN maiN jahaaN mujh ko
woh shaKhs acchhaa nahiiN lagtaa k jo tum saa nahiiN hotaa
ho dhuNdalii shaam aur wiiraaN galii meN tum chale aao
bahut chaahaa k aisaa ho, magar aisaa nahiiN hotaa
(1. the city of life)