dawaa'eN laakh kar dekhiiN, yeh biimaarii nahiiN jaatii
humaare Khuun se buu-e-zamiiNdaarii nahiiN jaatii
khulii aaNkhoN se shab bhar Khuubsuurat Khwaab bun'naa hai
aur us par yeh shikaayat hai k bedaarii1 nahiiN jaatii
kiyaa hai Ghaur humne bhii KhiradmandoN2 kii baatoN par
magar kyaa kiijiye deewano se yaarii nahiiN jaatii
miTaate haiN siyaahii woh k safhah3 phir se koraa ho
zaraa sii rah hii jaatii hai magar saarii nahiiN jaatii
raqam kartaa4 hai us ke zulm dunyaa meN koii 'Raaqim'
sitamgar fikr meN hai kyoN yeh dushwaarii5 nahiiN jaatii
(1. wakefulness 2. wise people 3. page 4. to chronicle 5. difficulty)