aNdhere aayeNge raah-e-hayaat1 meN jaanaaN
so apane hausleh kii lau jalaaye rakhnaa tum
hazaar haath tumheN apanii simt2 khiiNcheNge
par apane a'zm ko qaayim3 banaaye rakhnaa tum
nah jaane kab se yeh hum ko sikhaayaa jaataa hai
k tum ko dauRnaa hai dauRte hii jaanaa hai
har aik shaKhs tumhaaraa raqiib4 hai ya'nii
har aik shaKhs ko is dauR meN haraaanaa hai
nah jaane kitanii dafa'a hum se kahte haiN naaseh5
k aik pal bhii Thaharnaa shikast khaanaa hai
kise hai waqt maraahil ke lutf6 uThaane kaa
k tum ko duur abhii aur duur jaanaa hai
nasiihateN yeh magar Khauf kii haiN a'ulaadeN
ho dil meN Khauf toh manzil kabhii nahiiN miltii
k dauRne se faqat saaNs phuul jaatii hai
Khushii kaa karne se piichhaa Khushii nahiiN miltii
(1. path of life 2. towards themselves 3. firm resolve 4. rival 5. advisers 6. pleasures of the journey)