rah-e-ziist1 kii hai kahaaN koii manzil
abad2 tak hai rastaa, abad tak maraahil3
unhiiN se hai shikwaa hai jin kii yeh mahfil
jo kahiye toh mushkil, nah kahiye toh mushkil
tiraa be bahaa4 zikr hai is pe warnah
Ghazal kaa yeh kaaGhaz hai ik fard-e-baatil5
rahaa hii kahaaN rabt-e-alfaaz-o-ma'nii6
masiihaa bhii hai ab toh ik naam-e-qaatil
bahut der se taire jaate ho 'Raaqim'
chhalaawaa7 nah ho jo nazar meN hai saahil
(1. road of life 2. eternity 3. stations / journeys 4. priceless 5. worthless 6. bond of word and meaning 7. deception)