yeh tere saath ke maKhsuus1, qiimatii lamhe
rah-e-hayaat meN yeh chand nargisii2 lamhe
yeh lamhe hii toh mere saath saath chalte haiN
wagarnah3 maiN bhii kahaaN tak safar meN rah paataa
kaThin yeh raastaa, yeh dhuup aur yeh tanhaii
maiN kab talak yeh dahakte a'zaab4 sah paataa
yeh lamhe hii toh mere fann ko janm dete haiN
inhiiN se sha'irii mujh meN zaraa sii baaqii hai
wagarnah tiiragii5 hii tiiragii hai zahn miraa
inhiiN se hai jo kahiiN ik ziyaa6 sii baaqii hai
(1. rare 2. like narcissus flowers 3. or else 4. hardships 5. darkness 6. light)