log har baat ko be wajh baRhaa dete haiN
aik tasweer ko bhagwaan banaa dete haiN
kis ko fursat hai k har shaKhs kii fitrat samjhe
hum bhii har shakl pe ik mohr lagaa dete haiN
sach kaho, khul ke kaho, Dar ke nah Khaamosh raho
bas rahe dhyaan k log is kii sazaa dete haiN
apne andar ke sabhii deep bujhaa kar insaaN
saaraa jeewan kyoN aNdheroN meN bitaa dete haiN
bahs meN jeet'te haiN woh, jo ba Khuubii 'Raaqim'
apne jazbaat daliiloN meN chhipaa dete haiN